أنا هرقع بالتلاتين صوت هنا على السلالم

أنا هرقع بالتلاتين صوت هنا على السلالم

لأول مرة أشوف ڤيديو ومبقاش عايزة اعمل منشن للداخلية عليه لأني همووووت ويعملوا لنا جزء تاني منه 

الڤيديو لواحدة ست كبيرة زانقة شاب على السلالم ، والواد شكله صنايعي جاي يشتغل في شقة جار ليها وهي راسها وألف سيف إن ده حرااااامي ولازم تكلم له النجدة

ومجرجرة وراها جوزها وممسكاه سكينة وهو كمان راجل كبير وشكله مرعوش يا عيني وخايف من الحرامي ومن مراته ومن السكينة الي ماسكها ومن الضلمة ومن الموقف المنيل بستوميت نيلة ومن الكل كليلة وايده عمالة تترعش

تحت على البسطة التحتانية احنا سامعين صوت جارها وصوت واحد تاني شكله المعلم الي مشغل الولد الي مزنوق فوق …

الست كلمت حد من معارفها وقالت له تجيني حالا ده اتهجم عليا وعايز يضربني ، وربنا افتكرت أطاطا وهي بتقول باسني من بؤي يا حضبكباشي ومش عايزة أفسر بقى وهي اصلا مشرحة مليجي أخو أوشة

الواد بيقول لها يا ست أنا مبكلمش ستات انا بكلم جوزك ، قامت ناتعة جوزها ورا ضهرها وكومته في زنقور السلم الي هو اصلا ماسك السكينة والمفروض يدافع عنها ، وقالت للواد هاااهااااااي لا أنا صاحبة الشقة يا حبيبي وملكش دعوة بيه ده انا هرقع بالتلاتين صوت هنا على السلالم وألم عليك الناس

الواد يقول لها هنطططط من هنا … يقوم المعلم يقول له نوووووط يا أحمد وموت وخلصنا من الوقفة دي

هي تقول للواد هموووووتك … يقوم المعلم يقول له خليها تموتك يا أحمااااااا علشان نخلص في ليلتنا دي

جارهم بقى هو الي يسألها طب الي انتي كلمتيه طاااااه قدامه كتير ويوصل 

كل ده وأحماااااا يا عيني مزنوق على السلم وكشاف الموبايل بتاعها عامي عينه وهو أصلا لو اتمطع هيكومها هي وجوزها الي عمال يترعش ، وفي الآخر أحماااااا آخر ما زهق قام ناطط من فوق كوبستة السلم ونزل في الدور الي تحت وهي قاعدة تيصااااوااااات وتقول له وحياة أمك لهجيبك .

مبقيتش عارفة وأنا بتفرج على الڤيديو طب الست دي نمنشن لها وزارة الداخلية ، ولا نمنشن لها ولجوزها دار رعاية كبار السن ، ولا نمنشن لجوزها وزارة الصحة تيجي تعالجه من الخضة والرعشة وكومة السكر الي هتهجم عليه ، ولا نمنشن لأم وأبو أحمااااا ييجوا يلحقوه ولا نمنشن احتياطي لمؤسسات حقوق الإنسان علشان المعلم الي عايز يخلص من الوقفة السووووودة دي حتى لو احمد انقتل 

أنا كل الي عايزاه يعملوا لنا جزء تاااااااني وهي بترقع بالتلاتين صوت وماسكة عرقوبة أحماااا وهو مدلدل من السلم راسه تحت ورجليه فوق وجوزها بيقول له متقدررررررررش 

المنشور منقول نصا من صفحة اخبار مصر اليوم