اختي شاريه فيلا كانت مهجوره

اختي شاريه فيلا كانت مهجوره من زمان واصحابها مسافرين بره مصر.. المهم هدتها وبنيتها فيلا بردو لكن تصميم مختلف.. المهم هي مشطبه دور واحد بس تشطيب سوبر لوكس والباقي لسه بيتشطب.. ف حاطه فيها اوضه نوم عشان لما بنزل المنصوره اجازه بروح ابات فيها لوحدي.. هي مقفوله عالفاضي بقالها اربع سنين محدش عايش فيها.. بس بتروح كل اسبوع يوم بالنهار وتمشي..

المهم نزلت اجازه ورحت ابات فيها اول مره.. وكنت قاعد باكل ف اوضه النوم سمعت صوت ف الصاله…صوت زي صوت زمجره خفيف كده.. والمكان عشان كبير وفاضي اقل همسه بتسمع.. قمت لقيت قط ماشي فالصاله…بقوله بسبس.. القط ولا معبرني ولا خايف ولا كانه شايفني والله..الطبيعي لما تبسبس ل قط بيبصلك او بيخاف او بيجري.. ده ماشي ع رتم مشيه واحد وثابت والله ولا كاني هوا بكلمه.. قولت دخل ازاي؟

شكيت ف نفسي اني نسيت باب الشقه مفتوح.. لقيته دخل الحمام دخلت وراه لقيته قسما بالله وكانه اتبخر.. انا دمي نشف.. رحت اشيك ع باب الشقه لقيته مقفول… طب الشبابيك؟؟ كله مقفول..فهمت انه مش قط.. قعدت اقول بصوت عالي بسم الله الذي لا يضر مع اسمه شيء في الارض ولا في السماء وهو السميع العليم.. اتصلت باختي بقولها ايه الفيلا الخرا دي.. دي مسكونه. قالتلي يمكن بيتهيالك.. نام والصبح هجيلك انا والعيال.. قولتلها ماتيجي دلوقتي انا مرعوب  قالتلي انا ابات فيها؟؟

والله لو هتديني مليون جنيه ما ابات فيها لوحدي.. قولتلها امال ترمي اخوكي للعفاريت عادي  قعدت تقولي انا عارفه مين السبب.. هي عنيها اللي تتدب فيها رصاصه وراشقه ف حياتي وبصالي ف كل حاجه.. قولتلها ياستي احنا ف ايه ولا ف ايه.. خلينا ف النيله اللي احنا فيها دلوقتي ولا ف الست دي.. شوفي حل 

المهم نمت وطول الليل اصحي وكان فيه حد نايم ع رجلي… قسما بالله احساس يرعب  قولتلها اتصرفي قالتلي حاضر جابتلي تلاته راديو قالتلي خد وشغلهم قران… شغلتهم وبردو بحس نفس الشعور.. بالليل كان فيه حد معايا فالمكان بس انا مش شايفه.. اتلفت مفيش حد.. اناام واصحي من النوم كان فيه شخص نايم فوقي قسما بالله.. حد حصل معاه كده؟؟